- 464 -

1413. Sept. 1. Hainau.

Der Rath der Stadt Hainau bestätigt das für das St. Nicolaus-Hospital zu Liegnitz ausgesetzte Legat des hainauer Bürgers Johann Possig.

In gotis namen amen. Wen alle ding, dy do gescheen in der czit der gedechtnisse vorgeth vnd gleyt henweg mit vorwandelunge der czit, sullen sy denne in czukomphtigen czeyten czu kuntschaft vnd gedechtenisse brocht werden, ist is not, dy zu bestellen mit briffen vnd mit geczewgen zu bestetigen, dorumme ich Peter Holatsch burgermeister der stat Haynaw vnd wir ratmann doselbst dis joris mit allen, dy in czukomphtigen cziten czu ratmannen gekorn werden an ratis stat, bekenn wir ratmannn mit dem obgenanten Peter Holatsch, Peter Vogeler, Hannos Schefer, Hannos Weynrich, Niclos Roseman vor allen keyginwortigen vnd czukumpftigen, dy den brif sehen adir horen lesin, das for vns gestanden hot in vnser besessen rote Hannos Possig vnser meteburger, frisch, gesunt, wolbedacht, mutig alsso wir hoffin von sunderlicher vermanunge gotis vnd insprechunge des heyligen geystes hot angesehen, gemerket vnd vornunftlich bedocht dy kurze vnstetekit vnd vnsichirheyt dis sullen vorgenglichen lebisz noch ausprochs der heyligen lerer, wenn wir hy keine bleibende stat haben vnd nicht gewisses, wenn den tot vnd nicht vngewysses, denn dy czit vnd stunde des todis, wenne wir denne alle mitenander stheen werden vor dem richtestule des ewigen, ernsten, gestrengen richters zu antworten vmbe alle wort, werg vnd boze gedancken, doruff ein yderman belonunge nemen siner werken bose adir gut vnd yder mentsch vor sich selbis rechnunge geben .. Wenn is denne alsso gewant ist, das do man, weyb, kinder, bruder, swestern kleine achtunge haben vf der sele selekit, sunder nawir vf dis czeitliche guth, dorumme sulche ferlichkit czuvor czuvormeyden vnd mit dem vorgenglichen schatze czudirkrigen den ewigen, hot der obgenante Possig gedocht alsso vil, als im von gote gegeben ist, noch siner moglichkit czu bestellen, schicken vnd bestetigen sin selegerethe bey gesundem frischen lebenden leybe, dy weyle her des sinen mechtig vnd vornunftig ist, czu uergeben vf das, das noch sym tode nicht krig, geczenke noch czweytracht czwuschen sinen frunden enstunden, hot des goth czu lobe, dem heyigen czu eren, vnser liben frawen jungfrau Marien vnd dem heyligen sinde Niclos vnd den aremen lewthen czu troste vnd hulffe, sin selegerethe bestalt, gemacht vnd geschickit mit sulchir vndirscheid vnd meynunge, als hernoch geschreben stet. Czum irsten hot der obgenante Hannos Possig bescheyden vnd gegeben in name eins selegereths vnd vnschedelich siner macht vnd freyen wyllen, als hernoch geschreben steth, noch syme tode fumfczen marg czins vf dem rathusse czu Haynaw, dy sulle dy ratmanne czu der czit nemen, dorumbe gewant koufm vf Weynachten, dy armen nakten lewte czu cleyden, vffem lande vnd in der stat lewterlich durch got nicht durch gunst, dinst, libe adir fruntschaft wille, wo se dy dirkennen noch eren gewyssen vnd geswornem eyde; ab se anders teten, das louffe vf ere gewyssen. Item dy andern czwenczig marg czins doselbist vffem rathhawsse zu Haynaw vnd dy sechs vnd czwenczig marg czins vnd newn vnd dreysig marg zu der Sprottaw mit yczunt genanten sechs vnd czwenczig czins zu Gorlitz sullen noch des egenanten Possig tode sterben vnd gefallen czu dem kore czu vnser liben frawen, das man den kor anheben vnd maweren soll vnd mit namen dy fumczen marg czins czum gewande sullen ewiglich bleiben vnd sten noch sym tode czu dem selegerethe. Item im andern jore noch des obgenanten Possig tode dy vorgenanten czwencig marg czins vffem rathusse czu Haynaw vnd dy sechs vnd czwenczig marg czu Gorlicz mit den newnvnddreysig marken zur Sprottaw sullen dy ratmanne zu Haynaw dy helfte der czinse, dy sich geboren in demselben jore, geben czu der kirchen czu den monchen, das man se domit decke mit czygiln vnd in kein anders nicht wenden, vnd vmb dy andif helffte der obgenanten czinse xx marg vnd der sechs vnd czwenczig marg vnd der xxxix marke sullen denne dy ratmanne czewgen schicken vnd kouffin bethe vnd betegewant in das spital zu sinde Nicolaus den armen lewthen vnd pilgramen zu leger, hirberge vnd notdorfft, als nochgeschreben stet. Item im dritten jore dornoch sullen denne dy obgenanten xx marg vffem rathusse zu Haynaw vnd dy xxvii marken zu Gorlitz mit den xxxix marken czinsen zur Sprottaw mitsampt dem houbtgute, alsse gekouft sint, mit enander gancz vnd gar noch des egenanten Possiig tode, ab her vorschide ane leybgerben, vnd mit sulchir meynunge vndirscheyd, als hernoch geschreben stet, sterben vnd gefallen an das egenante spital, alsso das dofon dy armen pilgram vnd arme lewte hirbergen sal vnd speysen vnd den sichen kranken gebrechlichen lewthen dorynne trank, spise vnd leybs notdorfft dorum geben vnd ewiglich vnd alleczit dy armen pilgram dorynne herbergen, dy des begernde sint en notdorfft des leybis essin vnd trinken geben. Wer is ouch, das der egenante Hannos Possig von todis wegin vorscheyde vor dem weybe Annan, alsso das en dy frawe obirlebte, so sal dy frawe sin eweyb Anna haben vnd behalden dy brotbenke, dy mol vnd den hoff mit aller farnder habe, pferde, kuhe, sweyne, keins vsgenomen, gemachsam vnd gernlich von den sinen vngehindirt von einer yden person. Doch ist das alsso czu merken vnd czu vernemen, das der egenante Possig das selegerethe, schickunge vnd bestellunge in allen obgeschreben stuckelin, puncten, clausuln vnd artikeln mit sulchir vndirscheyd gemacht vnd gemeynet hat, das her sal vnd wil des sinen mechtig sin, dy weyle her lebit, domit zu thun vnd zu lossin noch sinem freyen willen, wy im das am besten gefellet zu keren vnd zu wenden. Auch in sulch mosse, meynunge vnd bestellunge, ab her leybs geerben gewonnen adir habin wurde, vnd dy hynder im lisse, so sal dese schickungen, gobe vnd bestellungen qweyd, ledig vnd los sin, vnd keine craft noch macht habin. Auch behaldit im der egenante Hannos Possig sulche macht vnd craft, das her dese selegerethe, gobe vnd bestellunge vnd schickunge in allen sinen clausuln, stuckelin, puncten vnd obgeschreben artikeln an sinem letzen ende, sich adir gesunt, noch siner frunde rath adir noch sinen eygin wyllen vnd gewyssen hohen adir nedern czu vor-wandeln noch sinem freyen willen, wy im das am besten gefellet vnd dy irsten goben vnd bestellungen mitenander zu wandeln alsso, das denne dy irsten goben nicht krafft sullen han. Des hot der egenante Possig dirwelet vnd vsdirkoren sine besteller vnd selewarters der obgeschreben sachen dy rathmannen zu Haynaw vnd alle nochkomen rathmannen doselbinst, das se dese dinge bestellen, schicken vnd handeln, als her en gloubt vnd getrawet, das se dorynne noch sym tode thun werden getrewlich noch iren gewyssen; ab se anders teten adir bestellten, das gehe vf se vnd ire gewissen. Auch sal man den briff alle jore lossin lesin vor dem newen rate vnd eldsten vf das, das se vnd ouch der spitelmeister vormanet werden, das se dese bestellunge holden, als geschreben stet. Dorobir ist dirre briff vorsegilt mit vnser stat groste ingesegil noch gotis geburt firczenhundirt jore im driczenden jore am ffreytage noch decollacionis Johannis baptiste.

O. d. St. L. No. 241. Das Siegel ist verloren.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866